ਇੰਸਟੀਚਿਊਟ ਆਫ ਜੀਨੋਮਿਕ ਮੈਡੀਸਨ ਦੀ ਸ਼ੁਰੂਆਤ
ਚੰਡੀਗੜ੍ਹ, 29 ਅਗਸਤ 2025: ਕੈਂਸਰ ਦੇ ਇਲਾਜ ਵਿੱਚ ਵਿਸ਼ਵ ਪੱਧਰੀ ਤਕਨਾਲੋਜੀ ਲਿਆਉਂਦੇ ਹੋਏ, ਫੋਰਟਿਸ ਹਸਪਤਾਲ ਮੋਹਾਲੀ ਨੇ ਇੰਸਟੀਚਿਊਟ ਆਫ ਜੀਨੋਮਿਕ ਮੈਡੀਸਨ ਦੀ ਸ਼ੁਰੂਆਤ ਕੀਤੀ ਹੈ। ਇਹ ਨਵਾਂ ਕਦਮ ਬਿਮਾਰੀ ਦੀ ਸਮੇਂ ਸਿਰ ਪਛਾਣ, ਸਹੀ ਡਾਇਗਨੋਸਿਸ, ਰੋਕਥਾਮ ਅਤੇ ਟਾਰਗੇਟਡ ਇਲਾਜ ਨੂੰ ਹੋਰ ਪ੍ਰਭਾਵਸ਼ਾਲੀ ਬਣਾਉਣ ਵੱਲ ਇੱਕ ਵੱਡੀ ਝਲਾਂਗ ਹੈ।
ਇਸ ਤਹਿਤ, ਜੈਨੇਟਿਕ ਟੈਸਟਿੰਗ ਜੀਨਸ, ਕ੍ਰੋਮੋਸੋਮ ਅਤੇ ਡੀਐਨਏ ਪੈਟਰਨਾਂ ਵਿੱਚ ਭਿੰਨਤਾਵਾਂ ਦੀ ਜਾਂਚ ਕਰੇਗੀ, ਤਾਂ ਜੋ ਕੈਂਸਰ ਨਾਲ ਜੁੜੇ ਜੀਨਸ ਦੀ ਪਛਾਣ ਕੀਤੀ ਜਾ ਸਕੇ। ਇਸ ਨਾਲ ਮਰੀਜ਼ ਦੇ ਭਵਿੱਖਲੇ ਖ਼ਤਰੇ ਦਾ ਅੰਦਾਜ਼ਾ ਲਗਾ ਕੇ ਸਮੇਂ ਸਿਰ ਢੁਕਵੇਂ ਇਲਾਜ ਦਾ ਸੁਝਾਅ ਦਿੱਤਾ ਜਾ ਸਕੇਗਾ।
ਡਾ. ਰਾਜੀਵ ਬੇਦੀ (ਡਾਇਰੈਕਟਰ, ਮੈਡੀਕਲ ਓਂਕੋਲੋਜੀ) ਅਤੇ ਡਾ. ਰਵਨੀਤ ਕੌਰ (ਐਸੋਸੀਏਟ ਕੰਸਲਟੈਂਟ, ਮੈਡੀਕਲ ਜੈਨੇਟਿਕਸ) ਦੀ ਅਗਵਾਈ ਹੇਠ ਵਿਦਵਾਨਾਂ ਦੀ ਟੀਮ ਜੈਨੇਟਿਕ ਜਾਣਕਾਰੀ ਦੇ ਆਧਾਰ ’ਤੇ ਕੈਂਸਰ ਦੀ ਸਟੀਕ ਪਛਾਣ ਅਤੇ ਖਾਸ ਤੋਰ ’ਤੇ ਤਿਆਰ ਕੀਤੇ ਇਲਾਜਾਂ ‘ਤੇ ਕੰਮ ਕਰੇਗੀ।
ਲਾਂਚ ਮੌਕੇ ਡਾ. ਰਵਨੀਤ ਕੌਰ ਨੇ ਦੱਸਿਆ ਕਿ ਕੈਂਸਰ ਵਿੱਚ ਜੈਨੋਮਿਕ ਟੈਸਟਿੰਗ ਆਮ ਤੌਰ ’ਤੇ ਖੂਨ, ਲਾਰ ਜਾਂ ਟਿਊਮਰ ਟਿਸ਼ੂ ਦੇ ਨਮੂਨਿਆਂ ਨਾਲ ਕੀਤੀ ਜਾਂਦੀ ਹੈ। ਨੇਕਸਟ ਜਨਰੇਸ਼ਨ ਸੀਕਵੈਂਸਿੰਗ ਅਤੇ ਤਰਲ ਬਾਇਓਪਸੀ ਵਰਗੀਆਂ ਤਕਨੀਕਾਂ ਟਿਊਮਰ ਦੇ ਅੰਦਰਲੇ ਜੀਨਸ ਦਾ ਵਿਸ਼ਲੇਸ਼ਣ ਕਰਦੀਆਂ ਹਨ। ਇਸ ਨਾਲ ਫਾਲਟੀ ਵਾਇਰਿੰਗ ਜਾਂ ਮਿਊਟੇਸ਼ਨ ਦੀ ਪਛਾਣ ਕਰਕੇ ਵਿਅਕਤੀਗਤ ਟਰੀਟਮੈਂਟ ਤਿਆਰ ਕੀਤਾ ਜਾ ਸਕਦਾ ਹੈ, ਜੋ ਇਲਾਜ ਨੂੰ ਹੋਰ ਪ੍ਰਭਾਵਸ਼ਾਲੀ ਬਣਾਉਂਦਾ ਹੈ ਅਤੇ ਮਾੜੇ ਪ੍ਰਭਾਵਾਂ ਨੂੰ ਘਟਾਉਂਦਾ ਹੈ।
ਇਹ ਤਕਨੀਕ ਵਿਰਾਸਤੀ ਤਬਦੀਲੀਆਂ, ਜਿਵੇਂ BRCA1/2 ਜਾਂ ਹੋਰ ਕੈਂਸਰ-ਸੰਬੰਧਤ ਜੀਨਸ ਦੀ ਪਛਾਣ ਲਈ ਵੀ ਵਰਤੀ ਜਾਂਦੀ ਹੈ। ਇਸ ਤਰ੍ਹਾਂ ਮਰੀਜ਼ਾਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਸੰਭਾਵਿਤ ਖ਼ਤਰੇ ਬਾਰੇ ਪਹਿਲਾਂ ਤੋਂ ਚੇਤਾਵਨੀ ਮਿਲ ਸਕਦੀ ਹੈ, ਜਿਸ ਨਾਲ ਰੋਕਥਾਮੀ ਜਾਂਚਾਂ, ਜੀਵਨਸ਼ੈਲੀ ਵਿਚ ਬਦਲਾਵ ਜਾਂ ਸਮੇਂ ਸਿਰ ਇਲਾਜ ਸੰਭਵ ਹੁੰਦਾ ਹੈ।
ਡਾ. ਰਾਜੀਵ ਬੇਦੀ ਨੇ ਕਿਹਾ, “ਜੀਨੋਮਿਕਸ ਦੀ ਮਦਦ ਨਾਲ ਕੈਂਸਰ ਥੈਰੇਪੀ ਹੁਣ ‘ਵਨ ਸਾਈਜ਼ ਫਿਟਸ ਆਲ’ ਤੋਂ ਬਦਲ ਕੇ ਵਿਅਕਤੀਗਤ ਹੱਲਾਂ ਵੱਲ ਵੱਧ ਰਹੀ ਹੈ। ਹਰ ਟਿਊਮਰ ਵਿੱਚ ਮੌਜੂਦ ਖਾਸ ਜੈਨੇਟਿਕ ਮਿਊਟੇਸ਼ਨ ਦੀ ਪਛਾਣ ਕਰਕੇ ਅਸੀਂ ਟਾਰਗੇਟਡ ਥੈਰੇਪੀ ਅਤੇ ਇਮਯੂਨੋਥੈਰੇਪੀ ਵਰਗੇ ਵਿਕਲਪ ਵਰਤ ਸਕਦੇ ਹਾਂ, ਜਿਸ ਨਾਲ ਮਰੀਜ਼ਾਂ ਲਈ ਨਤੀਜੇ ਸੁਧਰਦੇ ਹਨ ਅਤੇ ਬੇਲੋੜੇ ਮਾੜੇ ਪ੍ਰਭਾਵ ਘਟਦੇ ਹਨ।”
