ਭਾਰਤੀ ਮੂਲ ਦੇ ਵਿਸ਼ਵ ਪ੍ਰਸਿੱਧ ਵਿਗਿਆਨੀ ਅਤੇ ਫਾਈਬਰ ਆਪਟਿਕਸ ਦੇ ਪਿਤਾਮਾ ਡਾ. ਕਪਾਨੀ ਦੇ ਜੀਵਨ ਤੇ ਪ੍ਰਾਪਤੀਆਂ ਬਾਰੇ ਵਿਦਿਆਰਥੀਆਂ ਨੂੰ ਜਾਣੂ ਕਰਵਾਇਆ
ਬਟਾਲਾ:- ਸਕੂਲ ਆਫ਼ ਐਮੀਨੈਂਸ, ਧਰਮਪੁਰਾ ਕਲੋਨੀ, ਬਟਾਲਾ ਵਿਖੇ ਵਿਸ਼ਵ ਪ੍ਰਸਿੱਧ ਵਿਗਿਆਨੀ ਅਤੇ ਫਾਈਬਰ ਆਪਟਿਕਸ ਦੇ ਪਿਤਾਮਾ ਵਜੋਂ ਜਾਣੇ ਜਾਂਦੇ ਪੰਜਾਬ ਦੇ ਮੋਗਾ ਜ਼ਿਲੇ ਵਿੱਚ 31 ਅਕਤੂਬਰ 1926 ਨੂੰ ਜਨਮੇ ਡਾ. ਨਰਿੰਦਰ ਸਿੰਘ ਕਪਾਨੀ ਦੀ 100ਵੀਂ ਜਨਮ ਵਰ੍ਹੇਗੰਢ ਨੂੰ ਸਮਰਪਿਤ ਇੱਕ ਵਿਸ਼ੇਸ਼ ਸੈਮੀਨਾਰ ਕਰਵਾਇਆ ਗਿਆ।
ਇਸ ਮੌਕੇ ਵਿਦਿਆਰਥੀਆਂ ਨੂੰ ਮਹਾਨ ਵਿਗਿਆਨੀ ਦੇ ਜੀਵਨ, ਸੰਘਰਸ਼, ਵਿਗਿਆਨਕ ਪ੍ਰਾਪਤੀਆਂ ਅਤੇ ਕਲਾ ਤੇ ਵਿਰਾਸਤ ਦੇ ਖੇਤਰ ਵਿੱਚ ਉਨ੍ਹਾਂ ਦੇ ਯੋਗਦਾਨ ਬਾਰੇ ਜਾਣਕਾਰੀ ਦਿੱਤੀ ਗਈ। ਸੈਮੀਨਾਰ ਦੇ ਮੁੱਖ ਬੁਲਾਰੇ ਸ੍ਰੀ ਹਰਪ੍ਰੀਤ ਸਿੰਘ, ਵੋਕੇਸ਼ਨਲ ਲੈਕਚਰਾਰ ਨੇ ਡਾ. ਕਪਾਨੀ ਦੇ ਜੀਵਨ ਬਾਰੇ ਦੱਸਿਆ ਕਿ ਡਾ. ਕਪਾਨੀ ਨੇ ਫਾਈਬਰ ਆਪਟਿਕਸ ਤਕਨਾਲੋਜੀ ਦੇ ਖੇਤਰ ਵਿੱਚ ਬਤੌਰ ਮੋਢੀ ਵਿਗਿਆਨੀ ਮਹੱਤਵਪੂਰਨ ਖੋਜਾਂ ਕਰਕੇ ਆਧੁਨਿਕ ਸੰਚਾਰ ਤਕਨਾਲੋਜੀ ਦੇ ਵਿਕਾਸ ਵਿੱਚ ਕ੍ਰਾਂਤੀਕਾਰੀ ਤਬਦੀਲੀ ਲਿਆਂਦੀ।
ਅੱਜ ਹਾਈ ਸਪੀਡ ਇੰਟਰਨੈਟ ਰਾਹੀਂ ਦੁਨੀਆਂ ਦੇ ਇੱਕ ਕੋਨੇ ਤੋਂ ਦੂਜੇ ਕੋਨੇ ਤੱਕ ਸਕਿੰਟਾਂ ਵਿੱਚ ਤਸਵੀਰਾਂ ਸਹਿਤ ਪਹੁੰਚਣ ਵਾਲੀ ਜਾਣਕਾਰੀ ਪਿੱਛੇ ਡਾਕਟਰ ਕਪਾਨੀ ਦੀ ਵਿਗਿਆਨਿਕ ਖੋਜ ਦਾ ਯੋਗਦਾਨ ਹੈ। ਉਹਨਾਂ ਨੇ ਆਪਟਿਕਸ ਫਾਈਬਰ ਦੇ ਖੇਤਰ ਵਿੱਚ ਬ੍ਰਿਟਿਸ਼ ਵਿਗਿਆਨੀ ਹੈਰੋਲਡ ਹਾਪਕਿਨਸ ਨਾਲ ਮਿਲ ਕੇ ਪ੍ਰਕਾਸ਼ ਦੀਆਂ ਕਿਰਨਾਂ ਨੂੰ ਬਹੁਤ ਬਾਰੀਕ ਕੱਚ ਦੇ ਰੇਸ਼ਿਆਂ ਰਾਹੀਂ ਇੱਕ ਥਾਂ ਤੋਂ ਦੂਜੀ ਥਾਂ ਤੱਕ ਪਹੁੰਚਾਉਣ ਲਈ ਕਈ ਸਫਲ ਪ੍ਰਯੋਗ ਕੀਤੇ।
ਉਹ ਵਿਗਿਆਨ ਦੀ ਦੁਨੀਆਂ ਦੇ ਉੱਤਮ ਦਰਜੇ ਦੇ ਖੋਜੀ, ਉੱਦਮੀ, ਕਾਰੋਬਾਰੀ ਪ੍ਰਬੰਧਕ, ਅਕਾਦਮਿਕ ਵਿਦਵਾਨ,ਪ੍ਰੋਫੈਸਰ, ਮਾਰਗਦਰਸ਼ਕ, ਸਮਾਜਸੇਵੀ,ਕਲਾ ਪ੍ਰੇਮੀ ਸਨ।
ਉਹਨਾਂ ਦੇ ਨਾਂ ਉੱਤੇ 100 ਤੋਂ ਵੱਧ ਪੇਟੈਂਟ ਹਨ। ਅਤੇ ਉਹਨਾਂ ਵੱਲੋਂ ਕਈ ਵਿਗਿਆਨਿਕ ਖੋਜ ਪੱਤਰ ਅਤੇ ਕਿਤਾਬਾਂ ਲਿਖੀਆਂ ਗਈਆਂ।
ਸ੍ਰੀ ਹਰਪ੍ਰੀਤ ਸਿੰਘ ਨੇ ਵਿਦਿਆਰਥੀਆਂ ਨੂੰ ਡਾ. ਕਪਾਨੀ ਦੇ ਵਿਗਿਆਨਕ ਦ੍ਰਿਸ਼ਟੀਕੋਣ, ਨਵੀਨਤਮ ਸੋਚ ਅਤੇ ਖੋਜ ਪ੍ਰਤੀ ਸਮਰਪਣ, ਡਾਕਟਰ ਕਪਾਨੀ ਵਾਂਗ ਹਮੇਸ਼ਾਂ ਪੰਜਾਬੀ ਕਲਾ ਅਤੇ ਵਿਰਾਸਤ ਨਾਲ ਜੁੜਨ ਸੰਗ੍ਰਹਿ ਅਤੇ ਸੰਭਾਲ ਲਈ ਯਤਨਾਂ ਤੋਂ ਵਿਦਿਆਰਥੀਆਂ ਨੂੰ ਪ੍ਰੇਰਨਾ ਲੈਣ ਅਤੇ ਵਿਰਾਸਤ ਦੀ ਸੰਭਾਲ ਤੇ ਪ੍ਰਚਾਰ ਲਈ ਡਾ. ਕਪਾਨੀ ਦੇ ਯੋਗਦਾਨ ਬਾਰੇ ਵੀ ਜਾਣਕਾਰੀ ਸਾਂਝੀ ਕੀਤੀ। ਡਾਕਟਰ ਕਪਾਨੀ ਵੱਲੋਂ ਵਿਗਿਆਨ ਦੀ ਦੁਨੀਆਂ ਵਿੱਚ ਕੰਮ ਕਰਦਿਆਂ 1967 ਵਿੱਚ ਅਮਰੀਕਾ ਵਿੱਚ ਪੰਜਾਬ, ਪੰਜਾਬੀਅਤ ਅਤੇ ਸਿੱਖੀ ਦੇ ਪ੍ਰਸਾਰ ਲਈ ਸਿੱਖ ਫਾਊਂਡੇਸ਼ਨ ਦੀ ਸਥਾਪਨਾ ਕੀਤੀ ਅਤੇ ਕਪਾਨੀ ਕੁਲੈਕਸ਼ਨ ਉਹਨਾਂ ਦੇ ਸਿੱਖ ਕਲਾ ਸੰਗ੍ਰਹਿ ਅਤੇ ਵਿਰਾਸਤ ਪ੍ਰਤੀ ਮਹਾਨ ਦੇਣ ਹੈ।
ਦੁਨੀਆਂ ਭਰ ਤੋਂ ਸਮੇਂ ਸਮੇਂ ਤੇ ਮਿਲੇ ਮਾਣ ਸਨਮਾਨਾਂ ਦੇ ਨਾਲ ਸੰਨ 2004 ਵਿੱਚ ਭਾਰਤ ਸਰਕਾਰ ਵੱਲੋਂ ਪ੍ਰਵਾਸੀ ਭਾਰਤੀ ਸਨਮਾਨ ਅਤੇ ਦਸੰਬਰ 2020 ਵਿੱਚ ਉਹਨਾਂ ਦੇ ਸਵਰਗਵਾਸ ਹੋਣ ਉਪਰੰਤ ਭਾਰਤ ਸਰਕਾਰ ਵੱਲੋਂ ਸੰਨ 2021 ਵਿੱਚ ਪਦਮ ਵਿਭੂਸ਼ਣ ਨਾਲ ਸਨਮਾਨਿਤ ਕੀਤਾ ਗਿਆ।
ਇਸ ਮੌਕੇ ਵਿਦਿਆਰਥੀਆਂ ਨਾਲ ਡਾਕਟਰ ਨਰਿੰਦਰ ਸਿੰਘ ਕਪਾਨੀ ਜੀ ਦੀਆਂ ਕੁਝ ਖਾਸ ਤਸਵੀਰਾਂ ਅਤੇ ਵੀਡੀਓ ਵੀ ਸਾਂਝੇ ਕੀਤੇ ਗਏ।
ਇਸ ਮੌਕੇ ਰਾਜੇਸ਼ ਕੁਮਾਰ, ਲੈਕਚਰਾਰ ਫਿਜਿਕਸ ਅਤੇ ਸ੍ਰੀਮਤੀ ਸੁਚਿਤਾ ਪਾਲ, ਲੈਕਚਰਾਰ ਫਿਜਿਕਸ ਅਤੇ ਸ਼੍ਰੀਮਤੀ ਬਲਜੀਤ ਕੌਰ ਲੈਕਚਰਾਰ ਜੀਵ ਵਿਗਿਆਨ ਨੇ ਡਾਕਟਰ ਕਪਾਨੀ ਵੱਲੋਂ ਕੀਤੀ ਗਈ ਖੋਜ ਬਾਰੇ ਵਿਦਿਆਰਥੀਆਂ ਨਾਲ ਵਿਚਾਰ ਸਾਂਝੇ ਕੀਤੇ।
