ਕੈਨੇਡਾ : ਕੈਨੇਡਾ ਦੇ ਸਰੀ ਸ਼ਹਿਰ ਵਿੱਚ ਦੋ ਪੰਜਾਬੀ ਨੌਜਵਾਨਾਂ, 22 ਸਾਲਾ ਗਗਨਪ੍ਰੀਤ ਸਿੰਘ ਅਤੇ ਜਗਦੀਪ ਸਿੰਘ ਨੂੰ ਇੱਕ ਸੜਕ ਹਾਦਸੇ ਨਾਲ ਜੁੜੇ ਮਾਮਲੇ ਵਿੱਚ 3 ਸਾਲ ਦੀ ਜ਼ਿੰਦ ਨਾਲ ਸਜ਼ਾ ਸੁਣਾਈ ਗਈ ਹੈ। ਸਜ਼ਾ ਮੁਕੰਮਲ ਹੋਣ ਦੇ ਬਾਅਦ ਦੋਹਾਂ ਨੂੰ ਦੇਸ਼ ਤੋਂ ਬਾਹਰ ਕੱਢਣ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ। ਇਹ ਦੁਰਘਟਨਾ 27 ਜਨਵਰੀ 2024 ਨੂੰ ਸਰੀ ਦੀ 132ਵੀਂ ਸਟ੍ਰੀਟ ’ਤੇ ਵਾਪਰੀ ਸੀ, ਜਦੋਂ ਦੋਹਾਂ ਨੇ ਇੱਕ ਵਿਅਕਤੀ ਨੂੰ ਕਾਰ ਹੇਠ ਲਿਆਉਣ ਤੋਂ ਬਾਅਦ ਲਗਭਗ ਸਵਾ ਕਿਲੋਮੀਟਰ ਤੱਕ ਘਸੀਟਿਆ ਅਤੇ ਬਾਅਦ ਵਿੱਚ ਉਸ ਦੀ ਲਾਸ਼ ਨੂੰ ਇੱਕ ਸੁੰਨੀ ਗਲੀ ਵਿੱਚ ਸੁੱਟ ਕੇ ਮੌਕੇ ਤੋਂ ਭੱਜ ਗਏ।
ਅਦਾਲਤੀ ਦਸਤਾਵੇਜ਼ਾਂ ਮੁਤਾਬਕ, ਹਾਦਸੇ ਵੇਲੇ ਕਾਰ ਗਗਨਪ੍ਰੀਤ ਸਿੰਘ ਚਲਾ ਰਿਹਾ ਸੀ ਅਤੇ ਜਗਦੀਪ ਸਿੰਘ ਉਸਦੇ ਨਾਲ ਸੀ। ਉਸ ਸਮੇਂ ਕਾਰ ਵਿੱਚ ਇੱਕ ਹੋਰ ਨੌਜਵਾਨ ਵੀ ਮੌਜੂਦ ਸੀ, ਪਰ ਉਸ ’ਤੇ ਕੋਈ ਦੋਸ਼ ਨਹੀਂ ਲਗਾਇਆ ਗਿਆ। ਗਵਾਹਾਂ ਨੇ ਦਰਸਾਇਆ ਕਿ ਉਹ ਵਿਅਕਤੀ ਪਹਿਲਾਂ ਹੀ ਸੜਕ ’ਤੇ ਲੰਮੇ ਪਿਆ ਸੀ ਅਤੇ ਜਦੋਂ ਲੋਕ ਉਸ ਲਈ 911 ਤੇ ਕਾਲ ਕਰਨ ਲੱਗੇ, ਤਦ ਇੱਕ ਕਾਰ ਨੇ ਆ ਕੇ ਉਸਨੂੰ ਕੁਚਲ ਦਿੱਤਾ। ਗਵਾਹਾਂ ਦੀਆਂ ਚੀਕਾਂ ਵੀ 911 ਕਾਲ ਰਿਕਾਰਡਿੰਗ ਵਿੱਚ ਸੁਣੀ ਗਈਆਂ।
ਇਕ ਵਾਰ ਹਾਦਸਾ ਹੋਣ ’ਤੇ ਦੋਹਾਂ ਨੇ ਕਾਰ ਹੇਠੋਂ ਲਾਸ਼ ਨੂੰ ਕੱਢਣ ਦੀ ਕੋਸ਼ਿਸ਼ ਕੀਤੀ ਪਰ ਨਾ ਕੱਢ ਸਕੇ। ਬਾਅਦ ਵਿੱਚ ਉਨ੍ਹਾਂ ਨੇ ਕਾਰ ਨੂੰ ਇੱਕ ਸੁੰਨੀ ਗਲੀ ਵਿੱਚ ਰੋਕ ਕੇ, ਜਿੱਥੇ ਸਰਵੇਲੈਂਸ ਕੈਮਰੇ ਵਿੱਚ ਜਗਦੀਪ ਨੂੰ ਕਾਰ ਰਿਵਰਸ ਕਰਦੇ ਅਤੇ ਗਗਨਪ੍ਰੀਤ ਨੂੰ ਲਾਸ਼ ਖਿੱਚਦੇ ਹੋਏ ਦਰਸਾਇਆ ਗਿਆ, ਮ੍ਰਿਤਕ ਦੇ ਸ਼ਰੀਰ ਨੂੰ ਉਥੇ ਸੁੱਟਿਆ। ਫੋਰੈਂਸਿਕ ਜਾਂਚ ਵਿੱਚ ਗਗਨਪ੍ਰੀਤ ਦੇ ਹੱਥਾਂ ’ਤੇ ਮ੍ਰਿਤਕ ਦਾ ਡੀਐਨਏ ਮਿਲਿਆ।
ਸਰਕਾਰੀ ਵਕੀਲ ਨੇ ਅਦਾਲਤ ਵਿੱਚ ਕਿਹਾ ਕਿ ਹਾਦਸੇ ਤੋਂ ਬਾਅਦ ਦੋਹਾਂ ਨੌਜਵਾਨਾਂ ਨੇ ਉਸ ਵਿਅਕਤੀ ਦੀ ਸਹਾਇਤਾ ਕਰਨ ਦੀ ਥਾਂ ਉਸਨੂੰ ਸੁੱਟ ਕੇ ਭੱਜ ਜਾਣਾ ਇੱਕ ਬੇਹੱਦ ਨਿੰਦਣਯੋਗ ਕ੍ਰਿਤ ਹੈ। ਮ੍ਰਿਤਕ ਕੈਨੇਡੀਅਨ ਮੂਲ ਦਾ ਸੀ।
ਦੋਸ਼ੀਆਂ ਨੇ ਦੋਸ਼ ਕਬੂਲ ਕਰ ਲਿਆ ਹੈ। ਗਗਨਪ੍ਰੀਤ ਨੇ ਦਲੀਲ ਦਿੱਤੀ ਕਿ ਇਹ ਇੱਕ ਅਚਾਨਕ ਹਾਦਸਾ ਸੀ ਅਤੇ ਉਸ ਦਾ ਕਿਸੇ ਨੂੰ ਨੁਕਸਾਨ ਪਹੁੰਚਾਉਣ ਦਾ ਇਰਾਦਾ ਨਹੀਂ ਸੀ। ਉਸਦੇ ਵਕੀਲ ਨੇ ਵੀ ਦੱਸਿਆ ਕਿ ਉਸ ਦਾ ਕੋਈ ਪਹਿਲਾਂ ਦਾ ਅਪਰਾਧਿਕ ਰਿਕਾਰਡ ਨਹੀਂ। ਜਗਦੀਪ ਦੇ ਵਕੀਲ ਨੇ ਵੀ ਅਦਾਲਤ ਵਿੱਚ ਕਿਹਾ ਕਿ ਉਸਨੂੰ ਇਸ ਘਟਨਾ ’ਤੇ ਗਹਿਰਾ ਪਛਤਾਵਾ ਹੈ।
